مرحبا

صدقاً وبدون مبالغة...
من حوالي الساعة ونص فقط كان الجو صحو ومائل للحرارة
والشمس حدة!

هلأ وبهي اللحظة

السماء حمرة

والرعد عم يرعد بشكل مستمر بدون انقطاع وكأننا عالساحل...ونحنا بدمشق!




الصوت أشبه بصوت الموج.

المطر الحمدلله ..ان شاء الله تكون غيث...عم تنهمر بغزارة و بشكل غريب.

الله يبعت الخير.



موضوعي مالو علاقة مباشرة بهالموجة..


انا حابب اطرح عليكن فكرة
وبناءً على التصويت و نتيجتو رح يكون أو مارح يكون.


لما كنت عايش برات الشام
كن اشتهي شوف حدا مصور أي حارة و حاططها فيديو لأحسن شوف الشام و أهلها شو عاملين واتذكر حالي شو كنت اعمل و روح و اجي


هلأ السؤال وبدي التصويت فوق وليس بالموضوع كنص..الا اذا في اقتراحات معقولة


هل فكرة تصوير مقطع فيديو يومي لأماكن معينة بالشام ..يومياً ..ورفعها ..حتكون فكرة حلوة وفي مين يتابعها؟
ولا حتكون مجرد مضيعة وقت بالنسبة الي ما حدا مهتم؟

صوت فوق...وانا بوعدكن اذا كانت النتيجة ل"نعم" انو يكون التصوير مميز كل يوم لمكان بحسب مشاويري اليومية

بركي في حدا بيتروحن بالغربة!

ناطركن فوق بالتصويت.

__________________

في قلبي آهات وآهات وآهات كل ما شوف شي حار بالشام وبالأخص بحالتي في بلاد الغربيه

من كم يوم عم شوف مسلسل وشاء القدر انو كان تقريبا حوالي نص دقيقه مصوره مو بس بركن الدين ولكن بتم البنايه وكانت واضحه جدا بالإضافه للجنينه يلي مقابيلنا ... شغله عم قلك متل يلي سايف و مو مصدئ

ما بتصدق لك ابو البيس كمية السعاده والفرح والسرور يلي كانت مرسومه عوشي وما بتصدق أديش عدت اللقطه وتفرجت عليها مرات عديده كتييييييييييييييييييييييييييييييييييير



انا صوتت عالخيار الأول وبقوه



ابن الشام

__________________

حقيقه وليس حلم ... واقع وليس كلام

بس كنت مترددة اني احكي اي تعليق لانو ماعندي اي فكرة ساعد فيها

بس انا عم ئئرى شو كاتب ع المطرات مابعرف شو اوصف مشاعري حسيت نطف ئلبي ع الشام

وحارتها بير التوتة و وبيتنا والجسر الابيض والمهاجرين
وصرت اتخيل المنظر كيف شكلو والمي نازلةع الشوارع وفوئ البيوت
اتخيلت حالي وائفة تحت المطرات ومبلبلة ورافعة وشي للسما
وانا عم ادعي ربي واشكروا احلى شعور بالدنيا كلها


انا كمان صوتت ع الخيار الاول

__________________

شكرا ابو البيس على هالاقتراح وبعتقد انو الاغلبية وخصوصا من المغتربين حيكون اختيارهم البند الاول يلي انا صوتت عليه

بقى الله يرضى عليك لاتخلي ارنة بالشام الا وصورها مشان نتروحن بمناظر ومشاهد شامنا بركي

بتخف هالوحدة والحزن يلي عم نقاسيه بسبب بعدنا عن بلادنا ...

والله يهنيكم عالمطرات وان شاء الله خير عليكم وعلى الموسم

__________________

لكم صادفنا أحبة على الطريق
كم تعلقت قلوبنا بحبهم
كم تبسمنا للقياهم
كم ذرفنا الدموع لفراقهم
فهل ياترى سينسينا الزمن الأحبة
أم ستحتويهم الذاكرة بالمحبة

__________________

مرحبا أبو البيس ..

اقترحت علينا فكرة رائعة و حصرية في منتدانا .. يمكن ماسبق أيا منتدى تاني وفكر فيها ونفذها

و أكيد المغترب الي بحب بلدو مارح يعترض .. بالعكس تماماً إن قدر يدعمك كمان ما بقصر

:

:

إقتباس:

هل فكرة تصوير مقطع فيديو يومي لأماكن معينة بالشام ..يومياً

فكرة تصوير مقطع فيديو .. ممكنة بس بشكل يومي بظن فيها صعوبة عليك
طبعا ً أنت أدرى بوضعك ...
مع أنه يفضل كل ما صار تغير بالطقس عنا ينزل مقطع فيديو لمكان معين .. هاد برأي أحسن ألك و ألنا يعني في تنويع
ومرة يكون التصوير ليلي ومرة نهاري ومرة عند أول الفجر ... و شكلي عم عقدها لهيك رح عيركم سكوتي و احمل حالي وامشي


بس طلب زغير أو إذا بدك اعتبرو أمنية .. أمنية أخيرة

بآخر يوم من أيام الفحوصات بكلية الاقتصاد .. بكونو كل العالم مجتمعين بالكلية وحواليها ... منظر لا يوصف ..
إذا بتقدر بهاليوم تصورلنا كم مقطع ولو صور أرضية مافيها غير صوت و منظر الأرض الاقتصادية .. والأصوات لحالها بتذكرني بأيام حلوة

و بشكل عام إن كان للجامعات الدمشقية عندك زاوية بكاميرتك ياليت تحققلنا هالحلم و تلقطلنا هيك كم مقطع على زوئك ..

بالإضافة إلى الأسواق العتيقة و المطاعم القديمة و الأماكن الي بتذكرنا بريحة الشام ..و أنت أدرى

و كأني أنا زودتها شوي ... ولي

خاطركم لكن أنا طالعة ...

:

:

بس عنجد عنجد يا معلم ... فكرة حلوة كتير يعـ ـطيك العافية ..

__________________

مرحبااا

انا مش سوريه ولا مغتربه بس صوتت للاول طبعا

يعني اسمحولي من صغري نفسي اجي سوريا بس ما طلع بيدي للاسف

يعني بيقولو (الريحه ولا العدم) بنشوف التصوير اكيد بيعبر كتير واكتر من الصور

يسلمو ابو البيس سلفا

__________________

كتير حلوة فكرتك براي ياريت تبدا بحارات الشام كلها ...
من .... المهاجرين... ركن الدين .... الشاغور.... الئيمرية ...........الخ

تعمل زيارة لاماكن سياحية .... متل ئصر العظم.....قاسيون ...

الله يعطيك العافية


غزل خانم ست البنات ....

عندي اقتراح ابو البيس
اذا مافيها سألة
يكون التصوير مع صوت او بعد المقطع شرح صغير عن المكان المصور مشان الغربتلية او يلي
من خارج سورية يعرف اكتر عن الشام الحلو ة
مو شرط شرح مفصل
المهم اسماء او عناوين للمكان المصور

وسؤال كمان اذا عنا تصوير لشي غريب بالشام ممكن نضيفو ولا لأ
مثلاً
(يوم المطرة(الخميس)صارمنظر كتير حلو للبرق والرعد بمنطقة كفر سوسة (جنب وزارة الخارجية)
فينا نعرضه ولا لأ)
شكرا معلم

__________________

إذا سجدت فأخبرالله بأسرارك ......
ولا تسمع من بجوارك ......
وناج ربك بدمع عينك ......
فهو للقلب مالك ...........

هلا ابو البيس
بالرغم اني مالي مغتربة عن سورية بس مابعرف كل حاراتها
وانا بوافئ عالبند الاول وبالك انو فكرة حلوة
بس بتمنى انو مقطع الفيديو ما انحملو لحتى نشوفو يكون مباشرة
والك الشكر
لاتنسى المهاجرين وبير التوته وركن الدين
وياريت اتصورلنا الجامع يلي بيكون بكل منطقة بتمر فيها

__________________