ولا يهمك وما تخافي عليهون , آخدين حقهون وزيادة..
بدايةً , وجهة نظرك طرحتيها وبحترمها ..
وما بخالفك انو المرأة لازم تهتم ببيتها وولادها والخ ,, وهي أمور هية موجودة الها , ما منختلف ..
وانتي صح مو بحاجة لشغل لأنك ببيت أهلك , والأهل ما مقصرين بشي وبتفضلي تخدميهون , كمان حلو ..

وبعدين؟ حياة البنت بعدين وبين قوسين (بوقتنا الحاااالي) ركزيلي على وقتنا الحالي خطرلك شو ممكن او كيف ممكن تكون؟
في عدة احتمالات , ممكن تلاقي الزوج المثااالي , ومافي حدا مثالي فعلياً
وممكن لأ , و وممكن تضطر تعتمد على حالها لعدة ظروف رح تحيط فيها مستقبلا , و زمان أول تحوّل , يعني غير هلأ ,

يعني , هلأ وبهالوقت المرأة بحاجة لتشتغل وتستقل ماديّاً , هي وجة نظري
أضمن إلها مستقبلا لأنو يمكن الحياة تقسى عليها بشكل او بآخر
هالحكي ما اجا من و لاشي , هوة بس بسبب قصص منسمعها كتير وبكل مكان ,,

جملتك الأخيرة خلتني اكتب الرد
المرأة بحاجة لمين يطالب بحقوقها اكتر ..

__________________
smile with no regrets
Ask me!

.
.

أنا بعتذر عن الخروج عن مضمون الموضوع .. لكن بعض ما جاء في المشاركتين الأخيرتين حفزني أني أكتب هالرد :

قديمة ولا جديدة
بس الأكيد صحيحة
والشي يلي عم تعمليه هو يلي بخلي المرأة نصف المجتمع
هادا رأيي على كل حال

كلنا متفئين أنو المراة والرجل يكملان بعضهما ( أو يفترض بهما ذلك ) , والتكامل يقتضي أنو يكون لكل طرف دور يختلف عن الطرف الآخر .. بمعنى أنو المساواة بالواجبات هو أمر يخالف هالتكامل.

بجميع الأحوال ما ذهبتي إليه هو الأمثل والأجمل برأيي
أما الخوض فيما ذهبت إليه كلير فهو بحاجة لموضوع كامل والكثير من النقاش.

تحياتي

.
.

__________________

ايييييييييييييييه ذكرتيني أني مقصرة مع ماما كمان
عفكرة قليلين يلي بيفكروا متل ماحكيتي هلأ البنت بتقلك أنا مادرست والتعى قلبي لأشتغل خدامة لولادي مع أنو هي بتكون ملكة وقت بتخدم ولادها وزوجها ومن جواتها بتتمنى هالشي ....الشغل ضروري ايه أكيد ..بس كمان في شي رب العالمين فطر عليه المرأة وهو حب اعطاء كل ماعندها للي بتحبن ...كيف اذا كانو ولادها
مااااااااااااعلينا بلى ماأكلها حذف هلأ
---------------------------------------------------
كنت عم قول لحالي من فترة ...كأنو المعاييير انعكست ...يالله كأنو الصح صار غلط ..كانو يقولوا النصيحة بجمل ..جمل!!!! ...لك هلأ صارت النصيحة بكفين
كنا عم نحكي أنا وحالي وعم ناخد ونعطي لحد ماقطعت أختي الحديث لتصرخ بأعلى صوتها وتقول ...لك فهموني الصح صار غلط ومالي خبر ؟ ...ماقدرت جاوب أختي لأنو قبلها ماقدرت جاوب حالي
أديش حلو أنك تحس أنه في حدا عم يشاركك شعورك ..
وأديش حلو أنه يكون في مين حاسس فيك ...
أديش حلو وقت تسمع كم كلمة حلوة ....تعملك ريفريش لجواتك
وأديش حلو يكون عندك أخت رفيقة حنونة.....وأخت رفيقة مجنونة...بس كمان حنونة
أديش حلو تحس بالنعم اللي حواليك
بس صعب كتير أنك تشوف حدا قدامك مدايئ وماتقدر تعمله شي غير كلمة طوّل بالك وعلى ألله
ايه بالنهاية على ألله ...

__________________

مرحبا


هلة عطفا عالمشاركات السابقة
وانا بقترح ينعملو موضوع لحالو



هلة قرات مرة انو في فرق بين المراة والرجل
انو المراة قادرة على انها تعمل كذا غرض وتركز عكذا شي بنفس الوقت وتقدر تنجز كلشي

اما الرجل مابيقدر يعمل ويركز الا عشي واحد ولو عمل اكتر من شي مابيقدر ينجز كلشي

الخلاصة من هالكلمتين
انو عمل المراة بالبيت وبرة البيت سوا شي ممكن وبكفاءة عالية


هلة انا كشب وعبحكي راي الخاص
بحب البنت يكون الها استقلالية وعندها طموح وماتاخد الشهادة لمجرد تعلقها وتطلع عليها
انو بيتها وبس
لان هالشي حينعكس انو بحياتها حتصير تسكت للرجال لان لو تطلقو مثلا حتروح لبيت اهلها ومدري مين يعد يصرف عليها

والرجال بيقدر يكبر راس عكيفو لانو المراة جواتها في خوف

اما بالمقابل لو المراة اخدها الرجال وكانت داخلة للحياة وبتقدر باي ثانية تصرف عحالها حيصير نوعا ما في تكافئ بين الزوجين من ناحية انو الراي الافضل بيناتون يتاخد بالمشاكل
لان المراة لو كان رايها صح ماحتخاف تقولو وتاصر عليه لان مامنة انو لو صار ماصار حتقدر تحمي حالها

والرجال لو كان خطا ماحيثبت عرايو لان بيعرف انو المراة ماحتسكتلو عالطالعة والنازل وماحتموت من الجوع لو تركها


وانا بشوف كل رجال بالدنيا بيحب المراة القوية وبشدد القوية مو الفاجرة


هلة بيجوز حدا يقلي لهيك بتحمي حالها بالشهادة

انا بقول لا
لان لو تزوجت 20 سنة وبعمرها مااشتغلت بشهادتها ماحتقدر فجاة تشتغل بالشهادة ولو طلقت حتتعذب كتير وبجوز تشتغل شغل مادخلو بالشهادة بس كرمال تعيش

اما يلي عندها خبرة ومارسة العمل بالواقع فحيكون اسهل بكتير بالنسبة الها


ومشان كلام زهرا انو الحنية عالاولاد


انا بستغرب شي من الناس
انو عندها ياابيض ويااسود

طيب وين المنطقة الرمادي
او ليش مانقدر نجمع كذا صفة بالانسان الواحد القوة والاستقلالية والحنية القصوى

يعني هاد مومبدا انو يلي استقلاليتها عالية موحنونة

بس هيك


سلام

ما سمعت هالجملة سابقاً من أي بنت , ما في انثى بتفكر هيك , الا اذا كانت فاقدة شي من انوثتها ,
يمكن فهمتي الموضوع غلط زوزو ..

حسيتك عملتيني ضد انو تحب الام ولادها !!
شغلها ما بيلغي حبها لبيتها وولادها !! يعني هية ماعم تشتغل لحالها وبس!!
ولما بدنا نحكي انو رب العالمين خلق هالشي فطرة بالمرأة كمان معكون , بس احكو بالمقابل الشي اللي رب العالمين فرضو عالرجل وتعاملو مع المرأة , اللي ماعم نشوفو كتير بالوقت الحالي , واللي انا مشان هيك حبذت موضوع الشغل الها !!

هو الأمثل وقت بيستحق يكون الأمثل !!

الحكي بيطول كتير عن هالموضوع
وكمان بيتطلب نظرة أعمق للأمور , خصوصي من اللي فهمو ردي غلط ,

__________________
smile with no regrets
Ask me!

إقتباس:

ومشان كلام زهرا انو الحنية عالاولاد انا بستغرب شي من الناس انو عندها ياابيض ويااسود طيب وين المنطقة الرمادي او ليش مانقدر نجمع كذا صفة بالانسان الواحد القوة والاستقلالية والحنية القصوى

عمار انا ماقصدت أنه أبيض أو أسود بالعكس بس القصة أنه اختصرت بالحكي لحتى فعلا ما أطلع عن سياق الموضوع ..قلت أنه رب العالمين فطر المرأة ع حب العطاء وأكيد الرجل كمان بس القصد أنه المرأة عندها فائض من العاطفة والحنية بتحب تعطيه لولادها
ونفس الشي كلير الجملة يلي اقتبستيها هي كلمة صار اسمعتها أكتر من مرة من كذا بنت ومو القصد التعميم أبدا ...
يعني المرأة من القدم كانت وظيفتها الأساسية اتربي أجيال في كتير عظماء بالتاريخ كانت ورائهم أمهاتهم سبب لدفعهم للنجاح كتير علماء كانت زوجاتهم جنبهم عم تقدملهم الراحة والعون لحتى يصل للي بدو ياه ..
ومالي ضد شغل المرأة أصلا اذا بدنا نحكي ع وقتنا هلأ أكيد ضروري بس اللي حكيتو هو عن الفطرة العاطفة اللي رب العالمين منحها للنساء ....وخصصت عاطفة الأم ع ابنها
:
يلا هلأ مناكلها حذف أكيد

__________________

مرحبا
وبظن لهلأ هي الوظيفة موجودة... بس بظن حتى بالقدم كانوا النساء بالاسلام يشتغلوا ما كانوا ينزلوا عالمعارك ويوصلوا اكل ويداوا جرحى
بعدين ليش شايفين انو البنت اذا درست واشتغلت بتبطل تساعد اهلها...
انا بعرف اكتر النساء الناجحات هي يلي عم يشتغلوا وقدرانين يوفقوا ما بين شغلهن وولادهن وزواجهن وبيتهن..وهن بالفعل ناجحات...
فما بالكن انو ما عندكن هل المسؤلية الكبيرة يعني فعلا انا ما لي عم ادرس بس لاني بدي ادرس او حتى حط شهادتي عالحيط انا بدي اشتغل اصلا في فطرة بالانسان بوقت بيكون عم باخد وبعدين ما عاد بقدر يضل ياخد لازم يعطي وانا ما بحكي هيك اني بدي اترك امي .. انا حاليا مع دراستي بساعدها..

__________________

.
.

بداية أنا كتبت كلمة برأيي بعد كلمات الأصح والأمثل والأجمل ..
وذلك حتى ما يكون كلامي عم يحكم شو الصح وشو الغلط كما فعلت أنت !
يعني نوع من الليونة المطلوبة بهيك نقاشات

أما أزا حابة نشوف فعلا شو هو الأمثل
فالأمر بسيط جدا
لأن الصح والمفروض نتبعو كمسلمين هو كتاب الله عزّ وجلّ وتعاليمه
وربنا قال في كتابه العظيم : (( وقرن في بيوتكنّ ))

على كل حال هاد هو المرجع بالنسبة ألي وبالنسبة لكثيرين غيري .. ويلي بشوف غير هيك هاد بيرجع ألو بس أكيد ما رح يئدر يفرض وجهة نظرو عليي أو على غيري ممن يذهبون مذهبي.

في أعمال معينة تتطلب عمل المرأة للمرأة نفسها كالطبيبة أو المعلمة أو أو .. إنما أنا عم أحكي عالعمل بالإطار العام شأنه كشأن عمل الرجل

وشكرا

.
.

__________________

انا بالتأكيد ضد عمل المرأة بظروف معينة يعني لما يكونوا ولادها صغار مثلا والحالة المادية جيدة فبرأي مافي داعي لشغلها لانه قبل مانعتبر انه عم تظلم ولادها وجوزها حتظلم حالها بالدرجة الاولى يعني شو بدها تلحق لتلحق لو بتكون وزيرة بدها لما ترجع على البيت تطبخ وتنفخ وتتابع الولاد ودراستهم وووو..الخ وطبعا وشفت امثلة كتير ومعاناتهم ومن ضمنهم ماما ..
طبعا هاد مابينفي انه المرأة تدرس وتاخد أعلى الشهادات ...الدراسة والعلم للمرأة مو ضروري للشغل بس العلم بيفتح المدارك والمرأة والزوجة والام المتعلمة غير الأم الجاهلة ...
أما والله الولاد كبار مثلا وفي متسع من الوقت ..الحالة المادية أو الاجتماعية تستدعي العمل فتشتغل ليش لأ ...
بكلام اخر مافي حدى بينكر انه أولويات المرأة للولاد والبيت قبل الشغل والنماذج متاحة على ناس عملت العكس وتعبت كتير بحياتها

__________________

{ وَقَرْنَ فِي بُيُوتِكُنَّ …. }
لا تخرجن منها إلا "لحاجة"
ونحنا هون عم نحكي عن "الحاجة" اللي فرضها الوقت الحالي عالمرأة !

أول شي
"وذلك حتى ما يكون كلامي عم يحكي شو الصح وشو الغلط كما فعلت أنت !"

اذا حداوضع كلمة"برأيي" بعد جملتو فأنا خلص المفروض ما ناقشو ولا اعطي رأيي؟, ماهوة الموضوع للنقاش.
وأنا ما فرضت رأيي على حدا ,وما بكون هيك الا اذا انت شفتو هيك .

بالنسبة لجملتك :"ويلي بشوف غير هيك هاد بيرجع ألو بس أكيد ما رح يئدر يفرض وجهة نظرو عليي أو على غيري ممن يذهبون مذهبي"
لا تعليق !

الاسلام ما منع المرأة من العمل خارج المنزل , طالما هالشي بساعدها وبساعد عائلتها وطالما هية عندها الاستعداد الفطري لهالشي .. وكلو ضمن مبادئ الاسلام طبعا, الصدق الاخلاص الصراحة .. الخ
وحتى من الممكن انو يتغير دور الأزواج بالعائلة ! بشرط يكون كلو بإطار مصلحة الأسرة وسعادتها وبما يلاؤم احتياجاتها.
رح ناقشك متل ما ناقشتني بالكتاب الكريم وسنة نبينا محمد صلى الله عليه وسلّم ..

الآية الكريمة بتقول :
"وَأَنْ لَيْسَ لِلْإِنسَانِ إِلَّا مَا سَعَى" (53سورة النجم 39)
"لِلرِّجَالِ نَصِيبٌ مِمَّا اكْتَسَبُوا وَلِلنِّسَاءِ نَصِيبٌ مِمَّا اكْتَسَبْنَ وَاسْأَلُوا اللَّهَ مِنْ فَضْلِهِ..."

ومتل ما واضح من الآية انو ما في تمييز أبدا بين المرأة والرجل بموضوع العمل او كسب الرزق !
والعمل اللي عم نحكي عنو طبعا وبدون أدنى شك ضمن الأسس والطرق المشروعة والمبادئ اللي فرضها الاسلام واللي ذكرتها سابقا من صدق وما الى هنالك ..

الآية الكريمة بتقول :
"يَا أَيُّهَا الَّذِينَ آمَنُوا لَا تَأْكُلُوا أَمْوَالَكُمْ بَيْنَكُمْ بِالْبَاطِلِ إِلَّا أَنْ تَكُونَ تِجَارَةً عَنْ تَرَاضٍ مِنْكُمْ وَلَا تَقْتُلُوا أَنفُسَكُمْ إِنَّ اللَّهَ كَانَ بِكُمْ رَحِيمً"
و عَنْ الزُّبَيْرِ بْنِ الْعَوَّامِ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ: "لَأَنْ يَأْخُذَ أَحَدُكُمْ حَبْلَهُ فَيَأْتِيَ بِحُزْمَةِ الْحَطَبِ عَلَى ظَهْرِهِ فَيَبِيعَهَا فَيَكُفَّ اللَّهُ بِهَا وَجْهَهُ خَيْرٌ لَهُ مِنْ أَنْ يَسْأَلَ النَّاسَ أَعْطَوْهُ أَوْ مَنَعُوهُ".

كمان هون واضح تماما انو مافي تمييز بين الرجل والمرأة , والآيتين بيحكوا عن موضوع العمل والتجارة ..
......

في امور وأحكام بتتغير بتغير المجتمعات وظروفها و""بتغيّر الحاجات""
ومع ذلك المرأة من عهد الرسول صلى الله عليه وسلم اشتغلت بكافة مجالات الحياة بهداك الوقت .. وحتى بالحروب والمعارك متل ما ذكرت بلاك ..
و مثال بلقيس ملكة سبأ , واللي كمان جاء ذكرها بالقرآن الكريم .. كانت قبل الاسلام صح , بس ماجاء بعدين آية بالقرآن بتحكي عن سلبية وجودها بهالمكان ..

بوقتنا الحالي, مافي اسرة , طيب مارح عمم , أغلب الأسرما بتقوم بشكل منيح بدون عمل الشخصين المسؤولين فيها وهنن الرجل والمرأة ..
برجع وبقول احتياجات هالوقت هيك فرضت !

حتى بأمور القضاء مافي دليل واضح على انو المرأة لا يجوز انو تكون بهيك مواقع ..
والاحناف وغيرهون كمثال بيشوفو انو يمكن للمرأة العمل قاضية بالأموراللي بتكون شهادتها مقبولة فيها ..

باختصار ومن كل الأمثلة السابقة , الاسلام ما منع المرأة من العمل ومساهمتها بالحياة الاجتماعية وتنمية مكتسابتها المادية والمعنوية, و بامكانها العمل بداخل المنزل وخارجو .. بما انو هالشي بيأمن الها ولعائلتها ضروريات الحياة المختلفة ..
وهالموضوع تغيرت الآراء عنو أو بتتغير الآراء عنو مع اختلاف المجتمعات والبيئة الاجتماعية والثقافية ..

وبشكركل مين أبدى رأيو ..

__________________
smile with no regrets
Ask me!