هادا ياسادة ياكرام مرة كنت اعدة فايئة ورايئة حاطة ايدي تحت دقني وعيوني على السقف وبكامل الاسترخاء وعم احلم متل ماكل هالعرب عم تحلم
قلت لحالي ياترى لو لئيت الفانوس السحري شو بدي اتمنى طلعت يمين طلعت شمال شفت ولادي ادامي
قلت حاتمنى يكونوا أذكى ولاد بالدنيا يعني عباقرة عصرهم وفلتة زمانهم بحاكيهم الكلمة بيطلعوا منها بمعادلة ..بعدين راحت السكرة واجت الفكرة وبركي انطرقوا عين حاكم الناس هل الايام دوبها تحسد بعضها وتطرء عيون خلص بلاها مو ضروري يطلعوا دكاترة ..ليش كل الدكاترة اذكيا.............
بعدين افتكرت سبب كابتي ووجع راسي الغربة هي هيه احسن شي اتمنى ارجع واستقر بربوع بلدي البهية وبعد ماصفنت شوي كمان تذكرت اديش الناس والئرايبين بيحبوا المشاكل والئال والئيل ..بعدين شغلة تانية شلون نسيت انه هنيك مافي دي اس ال متل العالم وياهناه يلي بيقدر يركب يعني بدي انجلط على اديل أب لا خلص مابدي مابدي...
لقيتها أحسن شي شوف العالم وطير بلا جناحات من بلد لبلد من اقصى الشرق لاقصى الغرب ومن اقصى الشمال لاقصى الجنوب معناها بدي شوف الغنى الفاحش بجنوب فرنسا ومقابله الفقر العجيب بافريقيا وحشوف فلسطين وغزة واطفال غزة وحازعل ويتقطع قلبي خلص لابدي سافر ولا بدي ينهز بدني ولا بدي اتمنى ..........
واذ بيخطر على بالي هل الخاطر ليش مااتمنى تتحرر فلسطين وترجع لصحابها ...
وهون لعبت الانانية العربية دورها بمخي لأ يوه شو بدي بغيري أنا خليني بحالي أصلا تحرير فلسطين بده همة مابده أحلام ....(وهيك لئيت لحالي العذر) ...
اخر الشي طلع معي انه احسن شي اتمنى ألا أتمنى...

__________________

عجبتني الفكره .. لانو من فتره كانت دايره براسي

وكمان وصلت لذات النتيجه يلي وصلتيلها

لقيت حالي مقتنعه بذاتي ومقتنعه بالناس يلي حوالي ومقتنعه بالعيشه يلي عايشتها

والحمد الله راضيه اهلي امي وابي ومتأكده من انو رب العالمين بيحبني

بس بصراحه اتمنيت اني اقدر الغي المسافات يعني ما يبقى في مسافات بعيده

مثلا لاقي شي اختراع يخليني زور الناس يلي بحبهم ويلي هنن بعاد عني

يعني زور اختي الصبحيات بفرنسا وبالمره امرء على خالي اشرب معو فنجان اهوه

بعدها روح اتعشى مع خالتي بالشام وشئشئ على بيت ستي ولا مانع من شي مغامره لزيزه

وبيجوز بعدها زور قطر وشوف ابنو لابن عمي واخي بالرضاعه ايمون الزغير لاعبو شوي

وارجع نام بيبيتي وتاني انهار يجو هنن لعندي وهكذا ...

لانو الواحد مالو غير اهلو وناسو واحبابو

__________________

مرحبا مياس
امبارح تمنيت لو كان عندي فانوس سحري لارتاح شوي يعني بطلب من جني الفانوس يخليلي ولادو مو يحفظوا بس كمان يبلعوا الكتب لحتى بطل قلن اوموا ادرسوا

ومو بس هيك التعى قلبي منهم مشان غرفتهم يلي بيكركبوها دائما لهيك برمشة عين بتكون مضبوبة يعني برتاح شوي من الاوامر والتأمر عليهم

ومتل ماقالت نانو لو موجود هالفانوس كنا وصلنا الرحم عالاقل اسبوعيا يعني رح طئ على شوفة ابن أختي وبنت أخي ونفسي بوس ايد أمي و أبي واتصبح بوشهم واشرب فنجان قهوة معهم واطلعلي شي مشوار مع أخي وناكل آيس كريم من عند أمية بعز البرد (مجانين نحن )

ونفسي شوف فلسطين والعراق متحررين و البلاد العربية كلها مرتاحة من القال والقيل العرب عايشة برخاء و أمان ...

وبتمنى يكون عندي الفانوس لحتى لف الدنيا كلها واطلع عالقمر كمان ....

هي بعض الاشياء يلي بتمناها عن جد ...اذا لقيتي شي فانوس لاتبخلي علينا منستعارو منك شي اسبوع الله يرضى عليكي...

__________________

لكم صادفنا أحبة على الطريق
كم تعلقت قلوبنا بحبهم
كم تبسمنا للقياهم
كم ذرفنا الدموع لفراقهم
فهل ياترى سينسينا الزمن الأحبة
أم ستحتويهم الذاكرة بالمحبة

ممم بتعرفي انو لو كان لكل شخص امنيه يتمنى انو تتحقق
مارح يغير شي بدنيا
لانه الغني رح يتمنى انو يصير اغنى
والفقير رح يتمنى يصير غني

وهيك
بالنهايه العالم رح يضل متل ماهو
القناعه هي اغلى كنز ممكن نكسبه
هي دنيا هي يوم إلك ويوم عليك
قرش ابيض وقرش اسود

__________________

شكرا للجميع على ردودهم
في نقطة تانية مابعرف اذا واضحة كان قصدي اطرحها وعلى مبدأ الك ياكنة لتسمعي ياجارة انه منفكر بحالنا كتير وبحياتنا وبولادنا ومنحلم أحيانا احلام مستحيلة التحقيق واذا صار وفكرنا أو حلمنا بالنهاية بقضيتنا العربية منختلق لحالنا الاعذار وانه الاحلام مابتفيد وشو بيطلع بايدنا...ومننسى انه هالحلم ممكن التحقيق ...

__________________