كَبُرَ أبي ... كَبُرَت أمّي أصبحوا حملاً ثقيلاً شيئ لا يطاق القعدة معهن بتجيب الملل!!

حكيهن وحديثهن كلّوا بيجيبولي ياه من صفحات الماضي وكتب التّاريخ ... لك ليش أنا ناقصني ملل فوق مللي هففففففف ...

مرتي عم تعملّي مشاكل وجعتلي راسي ( تعا لهون أنا مو مجبورة بأبوك .. أنا مو مجبورة بأبوك..بيكفيني شغل البيت وملاحقة الولاد طول النهار .. وينا أختك ما بتاخدوا لعندا؟؟ وينوا أخوك ولا مريحلي مرتوا من هالهم !! يا امّا بتلاقي حل لهلمشكلة هي يا امّا أنا راجعة عبيت أهلي لانّوا أنا مو خدّامة لأبوك وامّك بعدين تعا لقلّك ليكوا سامر ابن عمتي لمّا أبوه كبر وصار حمل تئيل عليه وعلى مرتوا ودّاه عدار للعجزة وليكوا بيروح كل كم يوم بيشق عليه وبيطّمن على أحوالوا ... لك هونيك بيديروا بالن عليه وما بيخلّوا يحتاج شي سماع منّي وما تخرب بيتك هه)




هي القصّة أو المقدّمة اللي حبّيت ابدا فيها موضوعي من وحي الواقع هي مثال من بين عدّة أمثلة موجودة بمجتمعنا العربي والاسلامي...

شباب بعد ما كبروا أهاليهن (الأب أو الام ) أَمسوا مصدر ازعاج ,عبئ ثقيل لا يقوون على حمله .

ربّوك كل شبر بندر ,مع كل ضحكة منّك كان قلبهن يطير من الفرحة ,مع كل دمعة تنزل من عينك كانوا يتمنّوا لو يفتحوا قلبن ويحطّوك جواتوا ويطبطبوا عليك ..

انت ابنن انت الزهرة اللي قضّوا عمرن وهنن يعتنوا فيك حتّى شبّيت وكبرت وصرت واتصوّرت ,, اتزوّجت وصار عندك ولاد ,صار عندك عيلة ..

وهنن السنين ما نسيتهن وما رحمتهن بلّشت تسيطر عليهن آثار التعب بلّشوا يختيروا
( هي سنّة الحياة)

واجا دورك تفتح قلبك وتحطّن فيه ,اجا الوقت المناسب لحتّى ترد ولو جزء بسيط من الدّين اللي عليك ...

اجا الوقت اللي تعمل فيه واجبك تجاه هالشخصين الغاليين !! يا الله مأحلاهن وهنن كبار يا الله مأحلا هالتجاعيد اللي بوشّن كل تجعيدة منن بتحكي قصّة , بتحكي حكاية

يا الله شو حلو الواحد يقضّي يوم مع هالختايرة هدلون امّك وأبوك جنتك ونارك , حزنك وفرحك , وبدل ما تردّلن الجميل ,, بدل ما توفّي الدّين اللي عليك رحت حطيتهن بدار للعجزة ..

رميتهن بمكان حيطانوا غريبة عليهن , حطيتهن بمكان ما بيستاهلوا ينحطّوا فيه

انت يا مَرضي شو لح يكون شعورك لمّا يجيك خبر بانّوا أبوك أو امّك فارقوا الحياة وانت بعيد عنن؟

شو بيكون شعورك لمّا يجيك خبر انّوا أبوك أو امّك طلبوا شوفتك قبل ما يموتوا بشوي يا الله ماأعظم ظلمك .. يا الله ما أعظم جَورَك ..

راح تتندّم عكل دقيقة مرّت وانت بعيد عنن .. راح ترجع عالبيت وتراجع حساباتك .. شو عملت؟

شو هو الشّي اللي بيستاهل انّك تزت أبوك أو امّك بين حيطان باردة حيطان غريبة ..

ما خفت أو ما اجا ببالك انّو انت لمّا تكبر أبنك راح يرميك متل ما انت رميت أبوك أو امّك ...

ما اجا ببالك انّو (كما تَدين تُدان)

صرنا نسمع كتير بقصص هيك ... أولاد خائبين نسيوا انّوا أبوهن وامهن أمانة برقبتهن ولازم يحملوهن بكبرتهن ...

وفضّلوا يزتوهن بدار للمسنين ليقضّوا أيامهن الأخيرة بوحدة وعزلة فأي دين وأي ضمير بيحتّم على هيك ولاد يتصرفوا هالتصرّف؟؟

اجا دوركوا انتوا عبروا عن رأيكوا بهلموضوع

برأيكوا مو لازم نوجد عذر للشاب اللي بيحط أبوه أو امّو بدار للمسنين ( يعني بدو يعيش حياتوا .. بدوا ياخد راحتوا ..

هونيك بيعتنوا فيه أكتر وبيفهموا عليه وبيلبّوا طلباتوا بشكل أفضل ... بعدين بدو يتجنّب المشاكل مع مرتوا)

دار المسنين مو أريح للأم أو الأب من بيت الولد ومشاكل الكنّة ,, ويوم عند هاد ويومين عند هاد (متل الكرة تتقاذفها الأيدي )

انتَ أو انتي بتفكروا تحطّوا الوالد أو الوالدة بدار للمسنين ؟؟

شو الحالات اللي برأيكوا ممكن يكون وضع الأم أو الأب فيها بدار للمسنين قرار صائب؟؟


للحديث تتمّة انشاء الله

__________________

لاء مستحيل اعمل هيك شو ربوني وتعبو علي وبتربايتي وفنو حالهن مشان كون احسن العالم ...وعلموني الصح من الغلط

بئى بكافيهن وبعطيهن ضربة باخر عمرن وحطن بدار المسنين لاوالله

اعذروني للتعبير بس لو بدي اعد خدامة تحت رجليهن وشو ماكان وضعهن الصحي براسي بخدمهن
لاني ئد ماعملت وئدمت وخدمت بضل مئصرة بحقوقن

والله لو بكون خراب حياتي بسبب اعتنائي فيهن بعتني فيهن ومابتهمني حياتي وعمري كلو فداهن
ومالي مستعدة اغضب ربي يلي قرن برهن برضاه

بكفي كلمة رضا منهن وبسمة فرح ترتسم على وشهن الله يطولي بعمرن الهي

ويلي مافي خير لأمو وابو مابكون في خير لحدا تاني




باذن الله الي عودة

__________________

__________________

اعوذ بالله من غضب الله ...هيك منكافئ أغلى البشر ...اذا عملنا هيك يبقى شو ما صرلنا بحياتنا منستاهل ...

ربونا وتعبوا وشقيوا لشافونا كبار وفرحوا لفرحنا وزعلوا لزعلنا اذا حدا مسنا بوردة بيلحشوا عليه قنبلة

علمونا ..جوزونا..بعدين لما بيكبروا منتأفأف منهم ...كنا صغار تحملونا ولما كبروا وصاروا بأرذل العمر

نلحشهم بدار العجزة والسبب بيعتنوا فيهم اكتر ....

ومعقول الابن بتسيطر عليه مرتو وبتقلوا انا مابستقبلهم؟؟ نحن منعرف انو الكنة مو مجبورة بخدمتهم

بس الابن هو المجبور وهالشي مسؤول عنه ولازم يرضي امه وابوه قبل مرتو ولايرضي طرف على حساب طرف ...

الرجل لازم يحط حدود لمرتو ماتتخطاها مع اهله بس من غير مايظلمها يعني مايهملها ابدا ويكون عادل معهم

في حالات ممكن الالتجاء لوضعهم بدار المسنين متل:

اذا كان شغل الابن وقته طويل كتير ومافي حدا تاني يهتم فيهم وبينخاف عليهم يؤذوا حالهم او يطلعوا ويضيعوا وخصوصا للمصابين بمرض الخرف ...

او اذا بيسافر كتير والكنة رافضة الاعتناء فيهم وعدم القدرة على جلب خادمة تخدمهم ...او اذا كانوا

بيحتاجوا لرعاية طبية خاصة ...في حالات كتير وهي بعضها؟؟؟

بس بقلكم عن نفسي انا مستحيل حطهم بدار العجزة بالعكس رح ابقى اخدمهم طول عمري ورح

اتحملهم متل ماتحملوني لعل وعسى اؤدي القليل القليل من يلي قدمولي ياه ...وبتكفيني كلمة الله يرضى عليك وعلى ولادك بتسوى الدنيا كلها


الله لايقسيلنا قلب على أغلى الناس يلي عقوقهم من الكبائر يلي رب العالمين قرن رضاءه برضائهم

شوفوا مكانتهم عند الله عز وجل واتعظوا يامسلمين .

__________________

لكم صادفنا أحبة على الطريق
كم تعلقت قلوبنا بحبهم
كم تبسمنا للقياهم
كم ذرفنا الدموع لفراقهم
فهل ياترى سينسينا الزمن الأحبة
أم ستحتويهم الذاكرة بالمحبة

مافي أي سبب مقنع لحتى نتأفف من امنا أو أبونا مستحيل أو نحطهم بدار العجزه مستحيل

انا بتمنى انه يكونوا عايشين هلأ ومستعد اخدمهم طول عمري ولا بكون وفيتهم جزأ بسيط من تعبهم بترابيتي

فأنا ماشوف مبرر نهائي لوضع الوالدين بمأوى العجزه

__________________
......................



........

يعطيكوا العافية وبشكر اللي ردّوا عالموضوع

بدي احكي عن نقطة انطرحت خلال ردود الصّبايا وعلى فكرة هي البنت وحنان البنت مو شي غريب يعني

بس!!
يا ترى الزوج راح يتقبّل وجود الزوجة المستمر عند أهلها للعناية بهم.. أو راح يتقبّل وجود أهل زوجتو الدّائم أو الدّوري معهن بالبيت ..

أكثريّة الأزواج راح يعترضوا ويبدوا امتعاضهن من هيك أمر .. راح يقلّك الزوج أول شغلة انو

وين ابنوا هو المجبور فيه انت وراك مسؤوليّة وولاد وبيت وراح تقصّري بواجب بيتك وزوجك وولادك ازا زادت مسؤوليّاتك..

وازا اتغاضى الزوج مدّة معيّنة من الوقت هل يا ترى راح يتقبّل هالحالة للأبد ؟؟
وازا زادت الضغوط على المرأة وزادت المشاكل بينها وبين زوجها يا ترى راح تخضع المرأة لارادة الزّوج أم انّهاراح تتمرّد وتتمسّك بأبوها أو امها ..

كتير بنات اتمسّكوا بقرارن بس بالنّهاية خضعوا لارادة الزوج( منشان ما ينخرب بيتها أو منشان ولادها) فهل هاد الشي بيدل انّو هالبنت فرّطت بأبوها أو امها؟؟
واللي منلاحظوا انّوا كبار السن المتواجدين بدور العجزة الهن بنات وبيجوا بيزوروهن بدار المسنين ..

__________________

مزبوط كلامك عاشقة الوطن

لكن بالنسبة الي عندي امي وابي غلاوتهن بالدنيا كلها

وباذن الله لا جوزي ولا اي انسان مهما بلغت محبتي الو انو تغير معاملتي تجاهن

برأي الزوج لازم يفرح ويطمن انو زوجتو حنونة ع امها وابوها وعم تخدمهن وتعتني فيهن

لانو بكون عم يرضي ربو بموافقتو الها ودفعها لارضائهن وعم يكبر بعيونها بهالشي

وكلمالها بتصير تحبو اكتر وتئدر وئفتو معها بهيك وضع

__________________

وانا رايي من راي الكل انو مافي اي سبب يخلينا نحط اهلنا بدار المسنين
لانو بيكفي انو برضاهن ربنا رح يرضى علينا
يعني هالنقطة هي لازم تكون قدام عيونا على طول
اما قصة انو الزوج بيتضايق فهاد الشي بيرجعلوا لانو كمان متل ماهو لازم يهتم باهلو
لازم المرا كمان تهتم باهلا يعني اكيد هو بيعتب على خواتو اذا مقصرين اتجاه اهلو
بقى لو شو ماكان السبب لازم مانتركن

__________________

ماما هي الندى يلي بفيق على عطرو كل يوم وبنام وأنا متأكدة إنو رح يبقى معطرلي ليلي لحتى نام بهدوء
بابا هو الشمس يلي بتنورلي دربي وتحسسني بالأمان وبتكون معي خطوة بخطوة ومع كل خطوة شعاع جديد
إذا كان الله عز وجل نهانا عن كلمة أف يلي هي أبسط من أي تصرف فشو العذر يلي ممكن نفكر انو ممكن يبرر التخلي عن أغلى البشر ... من كل قلبي مستعدة قطع حالي مليون شقفة وشقفة وخلي كل شقفة مكان يدوسوا عليه لحتى يكون مكان واسع ومريح
بظن مأوى العجزة انوجد لأشخاص فعلا مالن حدا وما عندن أبناء يرعوهم أو لأشخاص فقدوا ذاكرتهم بعد شي حادث وبيبقوا بالمأوى لغاية ما يلاقوا حدا بيعرفن
أما بابا وماما فأنا مستعدة عيش بلا بيت بس خليهم معززين ومستعدة اشتغل أي شغل بيوفرلي مال حلال قدملن فيه لقمة طيبة ...
بتمنى لو كانوا بابا وماما رح يلاقوا ولادهم جنبن بس يكبروا بتمنى وقتها موت قبل ما شوفهم بلحظة ضعف ... أما لو ما رح يكون جنبن حدا بتمنى الله يمد بعمري لحتى اخدمهم بعيوني وبوس ايديهن ورجليهن صبح ومسا وشوف رضاهن علي
الله يخليلي اياكم يا أغلى البشر وتبقوا بكامل الصحة والعافية وتبقوا منورين حياتي وتاج فخر على راسي

__________________


أعشق عمري لأني إذا مت أخجل من دمع أمي

إقتباس:

انتَ أو انتي بتفكروا تحطّوا الوالد أو الوالدة بدار للمسنين ؟؟

اي ريتهم يعدموني من هلا لو بيوم فكرت هيك تفكير

هدول امي وابوي اللي ياما اعتنو فيي وانا صغير

وهلا انا صرت شب وبشوف الخوف عليي من غيونهم

لما لا سمح الله بدو يخطر ببالي هيك تفكير بتمنا الموت قبلو

اي ربوني وخلوني طول الحيط وافكر هيك تفكير لا والله

لو بضطر احملهم ع ايدي ولا بفكر هيك

ولو ع مرتي بالمستقبل بحاول اقنعها واذا تنحت الله معها لان رضا اهلي افضل من كل الدنيا

لان هم افضالهم ما بتخلص ولا قلبهم بيوم بيقسى علي

يارب ما يجيب هيك يوم ويخليهم فوق راسي

__________________